今日新十五,祝大家元宵節快樂👫 早排睇新X期,見到帝景有做自助餐住宿套票 $888, 有一晚山景房加兩位自助晚餐,覺得好似都幾平咁,就決定去試下! 帝景要係荃灣再轉van仔入去,去到check in 話升級左海景房,可能係平日,d房唔爆啦🤔。入到房覺得都算唔錯既,床都大,d 裝修都係酒店級別啦。不過個窗望出去得小小橋景同海景,但好過冇啦😛。廁所就唔係特別大,兩個人一齊沖涼,都尚叫夠位既。不過個電視呢,唔知點解睇唔到高清台... 但明明佢有寫有81, 99台個d... 但禁極都唔識禁🌚 算啦,諗住拉個電視出黎插usb自己睇戲,點知個電視係冇usb 位的... 夜晚就落去餐廳食buffet, 食物種類好小... 感覺上小過之前去麗豪食個早餐buffet😂。但都有食飽,同埋d 野食又未至於難食既。 整體黎講今次體驗算ok 啦... 雖然d 野食麻麻同個電視冇usb 位。但酒店既位置僻d, 好似去左渡假咁,個橋景同海景其實都幾靚既。走個時仲有免費shuttle 搭返出荃灣地鐵站,不過不失啦👀 酒店名稱:帝景酒店 Royal View Hotel 地址:荃灣青山公路353號 入住日期:28 Feb 2018 (Wed) 房價:$888 (一晚酒店連雙人自助晚餐) 房型:山景房 (check in時免費升級海景房) 訂房方法:帝景酒店官網
0 Comments
區區開房終於係沙田插旗喇!其實沙田真係好似唔多覺有時鐘,今次就去左沙田麗豪呀。傳聞都好多人話沙田麗豪係for情侶開房,但師傅之前都有keep住望,始終覺得房價有dd 高。今次book呢個高級房,加埋一先$605咋!話說1月23收到Regal Hotel 既promo email, 話有快閃特價,入去睇見到星期六既沙田麗豪都係$605, 所以就book 黎試試喇~ (上次去左土瓜灣iclub, check in 時,個職員叫我登記做member) 沙田麗豪係城門河隔離,距離沙田站有20分鐘路程,佢提供既shuttle bus 班次好疏,所以除左搭巴士/小巴,都係散步行過去啦。 check in 個時仲無啦啦送左個mouse pad. 之後就上樓入房,雖然個景淨係望到小小個河,但間房好大,裝修好光猛!張床好大!電視都大!一切都好好,乾淨、光猛、整齊。房內有暖爐,仲有兩枝細水送。 到夜晚食飯,間酒店都附屬有好多餐廳既,但其實行出酒店,係河畔花園個到都有d 餐廳,叫有d 選擇🙆🏻。 除左間房幾好之外,原來呢個價仲包埋自助早餐!訓醒就落去食早餐,食物選擇好多!保守估計有三、四十樣野食 (感覺😌因為冇仔細數,haha). 野食就唔逐樣講喇,我地呢到集中講房👼🏻。早餐就好難話超好食,好好食咁,但整體黎講係ok既,正常味道,食得飽飽。 另外提提大家,如果係房要做d 私人野呢,就記得要拉窗簾!因為師傅發現呢到係可以望到對面房入面既人做緊咩😯。 $605 有間咁大既房,裝修又唔錯,有咁多野食既自助早餐包埋!仲要係星期六黎,好滿意呀!👍🏻 (book 個時開hotelscombined 睇,同房型未加一已經要$1033 😛😛) 酒店名稱:麗豪酒店 Regal Riverside Hotel 地址:沙田大涌橋路34-36號 入住日期:3 Feb 2018 (Sat) 房價:$605 房型:Premier Room 訂房方法:RegalHotel Promotion email link 訂房日期:24 Jan Merry Christmas and Happy New Year! 🎅🏼🎉 大家今個聖誕過得開心嘛?師傅就同大王去左南丫島😙 真係第一次去離島開房😯 因為聖誕紅日,好多酒店都起晒價,所以今個聖誕我地就去離島避下世。 之前有網友介紹,話可以用holimood 個網訂d 渡假屋,咁今次就試下上去個網睇下d房同價錢,大時大節$650, 師傅覺可以接受啦。 入到去南丫島,係榕樹灣個碼頭上船。行大街個到,十分鐘左右就去到check in 個到。拎左鎖匙之後,姨姨就帶埋我地去間屋到,都幾近個登記處既。 一入到房,真係同佢網上d 圖片一樣,感覺都算乾乾淨淨,當然唔會有酒店咁靚,但整體都算ok. 不過廁所呢係用儲水式熱水爐,所以沖涼要沖得好快呀。同埋間房就冇提供tissue, 如果真係會去呢,記得要帶足tissue (有廁紙,但只能係廁所拎到). 電視都比想像中好,一開始仲驚係以前d大牛龜電視,但其實佢個電視可以插到usb, 仲有個dvd機添,而冷氣亦都夠涼! 整體黎講,d傢俬,房既裝修就係古式d架喇。但如果入去避世,休息下,過下二人世界,都係一個唔錯既經驗黎既! 夜晚我地仲去左附近既坊間cafe, 對住個沙灘,吹微微海風,幾浪漫架!😝❤️ 酒店名稱:南丫島利達富渡假屋 地址:南丫島榕樹灣後街21號地下B座 (登記處) 入住日期:24 Dec 2017 (Sun) 房價:$650 房型:雙人套房 訂房方法:Holimood.com.hk 訂房日期:23 Nov 今次黎到天水圍嘉湖海逸,其實係師傅見星期六,呢間都係五百有找,所以決定試下。去到reception, 佢同我地講,幫我地upgrade 左做豪華房😯。 唔知點解會咁好,入到房間房真係好大呀!同大王咁耐以黎,住過最大間既,有廳有廚房。張床又好大,個城市景又唔錯,望出去見到d 私樓同游泳池。 不過酒店附近,就得d 連鎖式食肆,但係住一晚,都叫ok 啦。酒店仲自己有個泳池,都唔算太多人去,d水幾清,今次真係覺得幾滿意呀👍🏻 酒店名稱:香港嘉湖海逸酒店 Harbour Plaza Resort City 地址:天水圍天恩路18號 入住日期:6 May 2017 (Sat) 房價:$491 房型:高級房 (check in 時升級左做豪華房) 訂房方法:hotelscombined -> ctrip 訂房日期:12 Apr 今日同大王帶大家黎到大埔,大埔好似真係個好地方,市中心有好多野食,又可以去下d 近郊地方。但好似就係冇咩地方可以比我地💏💏下。大埔都好似有d 時鐘既,但就係d 唐樓上面,或者有大埔酒店,但上網睇好似都唔平。最後我地就決定去大尾篤YHA, 又可以燒下野食,或者附近有d 徑/水霸,可以行下💑。 咁住得YHA, 其實都預左廁浴係共用架喇,不過呢次間房呢,就好似靚過上次昂坪個間,不過隔音都係差架喇🙊。canteen 廚房位都係一般般,有潔癖既人可能接受唔到。YHA 真係適合渡假咁既feel, 爆房就可能唔係太啱喇,不過都比大家參考下啦😁 酒店名稱:白普理賽馬會青年旅舍 地址:大埔大美督路66號 入住日期:18 Feb 2017 (Sat) 房價:$380 (會員價) 房型:雙人房 訂房方法:YHA 官網 訂房日期:20 Jan 2017 |
Author:
|